سـا الخـيـر: قودي بحذر ياختشي انتي و هي

Friday, January 26, 2007

قودي بحذر ياختشي انتي و هي

للبنات الغلبانة و انا بقول غلبااااااانة يعني المفتريات و المدردحات ينتحوا و يتنحنحوا و مايضيعوش وقتهم في قراءة البوست
بصي بقي.... بتحبي تسوقي؟؟ اسمعي الكلام عشان ماتكرهيش اللي ماصدقنا لاقيناكي بتحبيه.... مابتحبيش تسوقي؟؟ يبقي طبقي الكلام و ان شاء الله مش هتحبي السواقة بردو...
شوارع مصر الجميلة و أشجارها اللي عل ناحيتين هو صحيح مش شجر هي شجيرات ... و السيارات اللانهائية المصطفة علي الجانبين صف تاني و تالت و الناس اللي راكبة عربيات تشرح القلب و مش خايفين عليها ... و احنا معشر الاناث المحترم رايحين نقضي مصلحة أو خارجين نقضي وقت لطيف. نعمل ايه في وسط فوضي كل شيء؟؟ ماتتعبيش نفسك... كل شئ له حل.... الي نفسي و الي كل أنثي مؤدبة هذه الحلول ,,,, و نرجو بعد التطبيق موافاتنا بردود أفعالك و أيضا ردود أفعال الشارع العصري ... سوري المصري..مش فارقة
قبل النزول من المنزل .... لازم تتوكلي علي الله و دا شئ مفروض أساسي

..
بعد كدة... أكيد عايزة تفتحي عربيتك...حذااااري حذاااري استخدام الإو الإو...ماعندكيش فكرة دي بتنرفز الناس ازاي أما تطلع من بنت... لو مش عارفة ايه هو الإو الإو ...دا صوت الريموت

الحمد لله ركبتي بسلام... يالا اتحركي بقي...قبل ماتتحركي ضبطي مراياتك كويس و اتأكدي من البنزين عشان مش عايزين وجع دماغ ....اه ماتنسيس طبعا تقولي دعاء ركوب الدابة.... و اتحركي
بمجرد تحركك... اقفلي شباك العربية و شغلي أي حاجة بصوت عالي لمنع وصول صوت الكلاكسات لأذنك

اذا لاقيتي شباب مايص بيتبختر و هو معدي و تبختروا أكتر أدام عربيتك..... أدامك حل من التلاتة.... أول حل: ماتعمليش أي حاجة خالص و خليكي باينة باردة لحد مالقطيع ما يزهق و يعدي و كدة كدة انتي مش سامعة أي كلاكسات بتستعجلك... ...... تاني حل: زمري جامد كأنك بتضربي دكتور كنتي بتكرهيه في الكلية........تالت حل و دا أحلي واحد يا بنتي و الله: هوشي القطيع انك هتدوسيه و هيجري علي طول... مخاطرها انك ممكن تتشتمي بس زي ماتفقنا قبل كدة مش هتسمعي لأن الكاسيت عالي

لو شباب معوق حب يحوط علي عربيتك و يقفل المريات و يبطئ من حركتك و يقول كلام مضحك,,,, لا تبتسمي و لا تكشري... هتبتسمي هيفتكرك بتجري ناعم هتكشري هيزود فيها.... ارسمي وجه بارد و ماتكلكسيش خاااااالص و هدي و اركني علي جنب

جينا للجزء اللي بنكرهه كلنا لأننا أثبتنا فشلنا الذريع فيه...الركن.... ببساطة شديدة جدا... بردو أدامك حل من تلاتة.... الحل الأول: صاحبتك اللي بردو مابتعرفش تركن تركنهالك بس عشان تتريقي علي ركنتها و لا تتريق علي خيبتك..... الحل التاني: استجيبي للواد السايس و طلعي من جيبك نص جنيه و ماتزودييييييش... و خليه يقولك يمين و شمال لحد ماتركني.... الحل التالت و بردو دا أجمد حل.,... ارمي العربية في أي حتة بس المهم تكون بعيدة عن طريق مرور الهمج السايقين

ماتنسيش.... بلاش أو أوة أدام السايس عشان مايدعيش عليكي و يقول بنت و معاها عربية و انا راجل و معايا صفارة... ماتدفعيش مقدم أبدا للسايس ...قوليله : أما أرجع بس بلاش ألاطة و انتي بتقوليها

حذاااااري حذاااااااري حذاااااااري من الدخول في مشاجرات أو مشاحنات مع السيدات ذوات الشعر الأصفر و الحواجب اللي هتختفي و الصوت المزرزر.... دول يابنتي مهما حاولتي تبقي بت بيئة مش هتحصليهم...أفضل شئ هو تجنب النظر حتي اليهم بس مش في كل الأحوال و دا هتعرفيه في النقطة الجاية علي طول

لو لا قدر الله حصل حادثة حتي لو صغنونة.... ماتفكريش انتي اللي غلطانة و لا هو.... قبل أي حاجة انزلي من العربية و اهبدي الباب بعصبية و اردحي و لأنك واحدة مؤدبة مهما حاولتي تفتكري كل كلام المسلسلات و الأفلام اللي اتعلمتي منها هتنكشفي انك خايبة مابتعرفيش تردحي ... اليكي حل جامد.... اتكلمي لغات... انجليزي فرنساوي ألماني لغة جديدة آل يعني موجودة و عليييييي صوتك أوي.. ... بس اوعي تشتمي شتايم خالص عشان مش عايزين ذنوب علي الفاضي...... و الأهم من دا كله يا بنتي.... ماتكلميش أبوكي.. سيبيه في حاله.... كلمي أخوكي أو أي واحد قريبك عارفة انه بتاع خناقات عشان يلم صحابه و يعملولك منظر.... طبعا اذا انتي غلطانة أو هو ماحدش هياخد حاجة,,,, بس فايدة كل الهليلة اللي انتي عملتيها انك تروحي بيتكوا بسلاااااااااااااااااااااااااااااام

أطفال الشوارع و ما أدراكي ايه المخلوقات العجيبة دي.... هقول لك حاجة فيها قسوة جمدي قلبك و اعتبريهم لابسين طقية الاخفا,,, مش عشان تقلدي الاعلان أكيد بس لأنهم مش هيهمدوا الا بكدة...مسك في هدومك قاللك والنبي طب غوري ,,, كأنك صمااااااااء

واحد من اللي مسميين نفسهم أمين شرطة.... دول بقي يحبوا البنات الرزلة و الحلوة ...يحبوا الرزلات عشان يحرقوا دمهم بالتسخيف و يحبوا الحلوات عشان يحرقوا دمهم بردو بالمعاكسات البذيئة,,, اليكي حل بعتبره غبي بس لسة مالقيتش غيره..... ماقدمناش غير التلطف بس ماتفلتش منك ياماما و تقلب بمياصة .... يعني ييجي يقول لك: دانتي كدة تاخدي مخالفة.... ماتبقيش غير ذكية و تقعدي تتأكدي انك لابسة الحزام و مش واقفة صف تاني.,, توء توء و ألف توء.... قوليله و انتي مبتسمة و صوتك واطي بس مش لدرجة الهمس ها؟؟ : أصلي مش من هنا (حتي لو كنتي من هنا) أنا اسفة خالس( بالانجليزي أحسن كمان و كمان) و تقولي معلش لحد مايهز دماغه انتي حرة طليقة ...اجري بالعربية و قولي حيوان بس في سرك زي ماتفقنا عشان الذنوب

ماتتدخليش في عند مع سائقي الأتوبيسات الكبيرة و السيارات الصغيرة السبور بتاعة السبق... دول ممكن يسوحوا عربيتك و معاهم حضرتك....لذلك ( و الكاظمين الغيظ

)
و أخيرا .....انتقي من يجلس بجانبك....يكون حد بيهديكي مش يخضك و يقوللك خدي بالك تقومي تاخدي بالك فعلا بس رجلك لسة ماوصلهاش الأمر
نسيت صحيح....قبل ماتنزلي اشربي كاركاديه و ادعيلي

Labels: شكاوي و اقتراحات

posted by ALiaa @ Permalink ¤1/26/2007 09:30:00 am

14 Comments:

At 1/26/2007 12:06 pm, basma saghir said…

شوفي ياستي
مع انتي مش بسوق بس بقعد جنب ناس بتسوق احب اقلك من واقع تجربتي الشخصية اني بحس اننا رايحين مبارة مصارعة حرة ده طبعا بغض النظر عن الشتايم الكتيييييير جدا وجتكوا القرف ماتقعدوا في بيوتكم..مليتوا البلد

اما عن النظرات بقى: في نظرات معاكسة بريئة..وفي نظرات بذيئة زي ما انتي قلتي من امين الشرطة الي واقف على الاشارة..ده غير الكلام طبعا
وفي نظرات حقد..اه والله مع عربية البت صحبتي الي بنركبها قديمة وطالع عنيها ودي بقى بنشوفها من الناس الي متعلقة على باب اتوبيسات النقل العام

بقالنا كتير جدا متعاملناش مع عمو السايس علشان بنوقف العربية بعييييد عن اي مول وناخدها مشي تقدري تقولي عليه بخل مش مشكلة او ممكن تقولي احتاج على شغلة السايس اصلا ...احنا مش في اسطبل هنا

انا رغيت كتير بس اصل الموضوع فاقعني من زمان
يلا سلام
At 1/26/2007 6:01 pm, FATMA said…

نصايح جامده جدا يا لولو بجد
At 1/26/2007 9:55 pm, Anonymous said…

ايه خفة الدم دي .. صباح الكلكسات يعني

هي الحاجة ام حمزة جابت عربية ولا ايه ؟

... ابقي وصلي ام حنان واكسبي فيها ثواب بقى
At 1/26/2007 11:07 pm, Anonymous said…

بيسوو
كل متر في سايس يا بوسيكا.. ازاي فلتوا؟؟؟ أنا هبلغ عن الأماكن الفاضية عشان يغزوها

توتة توتة
ياللا عشان تبقي عارفة كل حاجة قبل ماتتعلمي

Abd El Rahman
صباح التريقة بجد يعني
:)
منين يا جادو؟؟؟ مانت عارف اني حكومة و بقبض 200 جنية بصرفهم علي الأدوات؟؟؟ دي عربية دادي
loooooooooooool
ماتجيب انت عربية و توصل أم حنان
At 1/27/2007 12:35 am, الناي الحزين said…

بسم الله الرحمن الرحيم

اولا لي تعليق
مادمتي قلتي ياختشي تبقي لازم تقولي انتشي

ثانيا

معاكي حق والله خصوصا لما تسوقي العربيه في اماكن مش هاي اوي
تلاقي الناس في الشوارع ماشيه عماله تبص لك

اه والله مانا مجربه دي حاجه تخنق

ولا لما تيجي تركني تحت البيت تلاقي واحد من الجيران مش بتطيقي خلفة....واقف يركنك عشان يسلم بقي في الاخر ويعيش الدور
ولا لما تكوني لسه في البدايه وواحد ظريف برضه من الجيران يشوفك وانتي بتركبيالعربيه ويادوووب علي مايعدي الشارع من قدام عربيتك تلاقيكي وبدون اي مقدمات لابسه في عربيه الجيران اللي قصادكو من غير ماتعرفي انتي عملتي ايه ولا طلعتي بالعربيه اصلا ولا لا.؟؟؟

نصيحه بقي قبل ماتزلي ابقي اقري المعوذتين وايه الكرسي وال7 ايات المنجيات واعملي كل المحصنات ضد عيون البني ادميييييييييييييين

بس في حاجه كتير اوي وانتي سايقه تلاقي ناس بتوسعلك وناس بتقفلك
برضه الانثي ليها احترامها

مش كله وحش يعني السواقه برضه ليها مميزات
At 1/27/2007 2:01 am, مـحـمـد مـفـيـد said…

ايه ده ايه ده
ده انتي مشاغبه بقي يا علياء
ايه النصائح الجامده دي
At 1/27/2007 9:19 am, محمد عبد الغفار said…

هو الأفضل ان الستات والبنات تبطل سواقه خالص هى دى احسن نصيحه

السبب الأول .. اى زحمه فى الطريق لازم تلاقى فى اخره واحده ست سايقه عربيه

السبب التانى .. وده اللى بجد مش تهريج اى احتكاك مباشر للست او البنت مع المجتمع للأسف بيكون بهدله ليها
At 1/27/2007 3:49 pm, Racha Khoury said…

عليا بجد بوست جميل قوي
انت عسل

انا بالنسبه ليا السواقة عالم تاني مش عارفه لو مكونتش بسوق كنت يكمن قتلت قتيل

هههههههه

اصلي بريح اعصابي بالسواقة متسألينيش ازاي

ههه

تحياتي
At 1/27/2007 10:21 pm, Anonymous said…

الناي الحزين:
هما فين اللي بيوسعوا دول؟؟؟ أمال محدش بيوسع لي ليه؟ يمكن لسة أدام ههههه

محمد مفيد:
أنا غلبااااااااان

Mohamed A.Ghaffar :
الرد علي أول سبب: تهريج فعلا
الرد علي تاني سبب: عندك حق يا باشا

Rasha:
أنا كمان و الله بهدي بالسواقة بس أما تكون لوحدي و مشغلة عمر خيرت أو منير أو العجمي أو هاني حلمي أو ابراهيم الفقي
At 1/31/2007 2:15 pm, قاسم أفندي said…

علياء
سالخير أولا
من مدة لما دخلت مدونتك أول مرة كنت قريت الموضوع ده وعجبني جدا أسلوبك وفطسني من الضحك .. النهاردة أفتكرتك لما جالي الايميل ده وحسيت ببعد نظر أخوانا في السعودية .. شوفي
،؛،. بسم الله الرحمن الرحيم .،؛،.

توصيات مجلس الشورى إلى رئاسة ديوان مجلس الوزراء

أنظمة وتعليمات قيادة النساء للسيارات في السعوديه

تنظيم وتعليمات قيادة المرأة للسيارة:
1- ألا يقل عمر السائقة عن 30 سنة.
2- موافقة ولي أمر السائقة على قيادتها للسيارة.
3- الحصول على رخصة قيادة من مركز تعليم القيادة النسائي.
4- أن تكون السائقة محتشمة في لبسها ولا تضع أي مواد للزينة بتاتاَ.
5- يسمح لها بالقيادة داخل المدينة فقط ولا يسمح لها بالقيادة خارجها بدون محرم سواء القرى أو الضواحي.
6- تحدد أوقات السماح بالقيادة من الساعة السابعة صباحا وحتى الساعة الثامنة ليلاً أيام السبت إلى الأربعاء, وفي يومي الخميس والجمعة من الساعة الثانية عشر بعد الظهر إلى الساعة الثامنة مساء.
7- أن تحمل معها هاتفاً للحالات الطارئة.
8- الإتصال على مركز المرور النسائي في حالات التعديات والمشاكل أوعطل السيارة.
9- دفع مبلغ مالي معين سابقاً في حساب الرخصة لدى المرور النسائي مخصص لتصليح أعطال وبنشر السيارة عند الحصول على الرخصة.

ب-الجهات المسؤولة:
1- إيجاد قسم مرور نسائي مختص بقبول البلاغات عن التعديات على السائقات والاتصال بشركات الإصلاح والبنشر وجر السيارات وكذلك الاهتمام بأمر المخالفات المرورية وتحريرها.
2- إيجاد رقم هاتف مجاني للمرور النسائي.
3- وضع مراكز داخل المدينة للمرور النسائي تشرف عليها جهات دينية مسؤولة.
4- استحداث شركات مختصة بالصيانة الخفيفة والبنشر وجر السيارات بالتنسيق مع المرور النسائي.
5- تجديد رخصة السير كل سنة وأخذ قيمة الإصلاحات وجر السيارة مقدما.
6- على رجل المرور استدعاء المرور النسائي لتحرير المخالفة ضد السائقة وعدم الحديث معها بتاتاً.
7- معاقبة من ينتهك الأنظمة دون إستثناء لان انتهاك أي من هذه القوانين هو انتهاك للأعراض وأمن البلد.

ج- أنظمة العقوبات:
فيما يتعلق بالعامة:-
1- معاقبة من يتحدث إلى سائقة بعقوبة لا تقل عن السجن لمدة شهر مع الغرامة المالية.
2- من يثبت عليه محاولة التحرش أو مطاردة أو معاكسة سائقة يعاقب بالسجن مدة لا تقل عن ثمانية أشهر مع الغرامة المالية.
3- معاقبة من يحاول التضييق على السائقة في السير بالتوقيف لمدة يوم مع الغرامة.
فيما يتعلق بالسائقة :-
عند ثبوت قيام السائقة بما هو مخل للآداب والشرع للمرة الأولى تعاقب بالآتي:
1- سحب رخصة القيادة منها لمدة لا تقل عن ستة أشهر مع الغرامة المالية(500-1000ريال) وأخذ التعهد عليها بعدم العودة

تقوم به رئاسة المرور النسائي

2- إبلاغ ولي أمرها رسمياً عن طريق هيئة الأمر بالمعروف والنهي عن المنكر.

تحياتي
At 2/01/2007 2:31 am, soulmate said…

السلام عليكم ورحمة الله وبركاته

اولا الوست جميل جدا وكتابتك حسسيتنى انى بجد شايفه كل حاجه قدامى يعنى انتى لامساه بد وفكرتينى باول حادثه عملتها فىحياتى باول عهدى مع السواقه ال يعنى بقالى سنين دا انا بعدها تقريبا بطلب المهم كنت بقى عامله فيها البنت الشهمهالى حتوصل اصحابها وصلتهم وتوهت انا وبقيت ماشيه بسال الناس انا فين لح ما هوووب خبطت فى عربيه جميله نص نقل الراجل نزل قعد يبصلى العربيه بتاعتى بقت خردهالكبوت لزق فى الازاز وهو يا دوبك خدش فى الفانوس عملىقضيه وقالى حقى وبتاع وفجأهظهرت الطفله التى بداخلى واديتها عياط لدرجه انى صعبت على راجل صاحب محل واخدنى عنده عشان يهدينى والى من شويه كانت عامله نفسها سبع بقت قطه وبعد ما الراجل هدانى لقيت بابا الحمد لله وصل وزعقلى وراضى الراجل وكانت نهايه القصه من بعدها اعتقد انى بقيت اعصبى متدمره اكتر ما هيا يلا سلاموعليكو
At 2/02/2007 9:39 am, ALiaa said…

قاسم أفندي:
من الاخر ماتنزلش تسوق بس بشكل مهذب
هههه

مشمشة:
يابنتي أنا أول مانزلت كان نفسي أعمل حادثة عشان أخلص من أول حادثة و أرفها...أصلها بتبقي عاملة زي امتحان الثانوية العامة...شر لابد منه و لسة مافيش حوادث
At 2/02/2007 9:39 am, ALiaa said…

قاسم أفندي:
من الاخر ماتنزلش تسوق بس بشكل مهذب
هههه

مشمشة:
يابنتي أنا أول مانزلت كان نفسي أعمل حادثة عشان أخلص من أول حادثة و أرفها...أصلها بتبقي عاملة زي امتحان الثانوية العامة...شر لابد منه و لسة مافيش حوادث
At 2/13/2007 4:59 pm, الحصان الأسود said…

ههههههههههههه

بوست ظريف جدا ودم خفيف جدا جداً

انا طول عمري باكرة سواقة الستات و بطئهم وباتريق على طريقتهم في السواقة والركن

بس من النهاردة وبعد ما قريت الموضوع الظريف دة حابطل كل دة

انا اول مرة اخش مدونتك بس بجد اسعدتني جدا و غيرت الموود خالص

تحياتي يا سكرة

على فكرة بلاش تضربي اختك بالقلم والتانية بالبوكس عيب قوي تصرفات الشضلية دي

ابقي غزيهم بالمطوة وخلصي

ههه

Post a Comment

<< Home

أقر أنا المذكورة ادناه ساكنة في العنوان اياه

Name: ALiaa
From: cairo, Egypt
About me:
More..

بار المزيكا:الجريدة-مارسيل خايفة

ساالخير علي الناس الجميلة

اذا حار أمرك في معنيين و لم تدر أين الخطأ و الصواب....فخالف هواك فان الهوي يقود النفوس الي ما يعاب.............. رحم الله الشافعي

اللي اتكتب في الفترة دي

في عزلتي وحدة تكفي لكم جميعا.............. فتعالوا

من شعر الحكمة العربي القديم

دع الاقدار تفعل ما تشاء وطب نفساً بما فعل القضاء ولا تفرح ولا تحزن لشيء فان الشيء ليس له بقاء

قالوا

الحياة إما أن تكون مغامرة جرئيه ... أو لا شيء هيلين كيلر

ابليس و دهائه

العجب لبني آدم ! يحبون الله ويعصونه ، ويبغضونني ويطيعونني

ان كيدهن عظيم

تشاجر زوجان وامتنعا عن الكلام ، وقبل أن يصعد الزوج للنوم ، قدّم لزوجته ورقة مكتوب عليها : ايقظيني الساعة الخامسة صباحاً ، وفي اليوم التالي استيقظ الزوج ، ونظر الساعة فوجدها الثامنة ! فاغتاظ ، ثم لبس ثيابه ، ولما أراد الخروج ، نظر فرأى ورقة مكتوب عليها : استيقظ ، الساعة الآن الخامسة

بيان من مرسيل خليفة وقاسم حداد

عندما ذهبنا إلى التراث العربي بحثاً عما يضئ حاضرنا، ونستعيد به ما نسيناه وما افتقدناه في حياتنا الراهنة، نعني الحب، جلبنا درّة الحب الخالدة، شعلة الوجد التي لا تخبو جذوتها ما دام هناك عاشق أو عاشقة يتنفسان الحب. جلبنا حكاية من ذابَ – وقيل من جُـنّ- حباً، وقمنا بصقل الحكاية بما تيسر لنا من شعر وموسيقى وغناء ورقص ودراما. وما كان لدينا غير مطمحٍ واحدٍ: أن نحرض الناس على الفرح لا الغياب، على الحياة لا العدم. كانت غايتنا أن نعبّر عن العاطفة الإنسانية في أبهى وأنقى تجلياتها، وأن نمجّد الجدير بالتمجيد: الحب. أبداً لم تكن غايتنا أن ندغدغ الغرائز الأدنى عند جمهور جاء، بكل براءته وثقته وفطنته، ليعرف ويستمتع ويفتح قلبه على سعته، بلا موقف مسبق، بلا ضغينة، ولا أحكام. جمهورٌ بيننا وبينه ميثاقٌ من الاحترام المتبادل، لا يمكن أن نحط من قدره بتقديم ما هو فجّ ومسفّ ومبتذل. لكن أبداً لم يخطر ببالنا أن ما نقدمه من عرض نظيف وبريء، ومتجرّد من النوايا السيئة والخبيثة، سوف يتم تأويله –غيابياً- بخلاف ما هو مقصود، وسوف يرى فيه حماة الدين والأخلاق والطهارة عملا فاحشاً ومعيباً، وسوف يرون فيه خروجاً على الشريعة الإسلامية والأخلاق العامة. إن محاولة نواب الكتل الإسلامية، وأتباعهم، التصدي لعمل "مجنون ليلى"، ولكافة فعاليات "ربيع الثقافة" في البحرين، وتشكيل لجنة تحقيق في ما يسمونه خروجاً على الشريعة، مثل هذه المحاولة لا ننظر إليها بوصفها رغبةً في تصفية حسابات سياسية أو شخصية، بقدر ما ننظر إليها، عمقياً، كمحاولة مقصودة، ومنظمة، لإرهاب كافة أشكال الفكر والثقافة، وقمع كل مسعى إبداعي. الثقافة الحرّة، الرافضة للامتثال، هي المستهدفة. إنه دفاعٌ باطلٌ، عقيمٌ، مشكوكٌ فيه، عن دينٍ لا يستمد قوته وعظمته واستمراريته من العنف (اللفظي والبدني) الذي يمارسه فقهاء الظلام وتجار الفتاوى، بل مما يدعو إليه من تعايش وتسامح ومحبة. دينٌ، في جوهره، قائمٌ على الحوار والاجتهاد. دينٌ لا يحتاج إلى دم شاعرٍ أو صمت أغنيةٍ كي يحافظ على بقائه، لا يحتاج إلى صراخ وانفعال وتشنج في الدفاع عنه. إنها دعوة صريحة ومباشرة للانغلاق، لمصادرة حق الآخر في التعبير، لإنكار تعددية الأصوات، والمفارقة أن تنطلق هذه الدعوة من موقعٍ (برلمان) يُفترض فيه أن يكون منبراً لمختلف الأصوات والاتجاهات. إن مثل هذه الدعوة لا تحتقر الإنسان الحر، الراغب في المعرفة والمتعة، لكنها تحتقر أيضاً بلداً متحضراً ينتمي إلى القرن الحادي والعشرين. لذا يحق لنا أن نتساءل: هل يليق بوطن متحضر أن يمثّل شعبه نوّابٌ يتوهمون امتلاك السلطة.. سلطة المنع والكبح والمصادرة؟ نواب ترتعد فرائصهم كلما لاحتْ في الأفق قصيدة أو أغنية لا تمتثل لشروطهم فيستنفرون الكراهية والتعصب؟ نوابٌ يرون الشيطان الرجيم يسكن في كل أغنية أو رقصة أو مشهد أو نص؟ نوابٌ يظنون أن الله يبسط، لهم وحدهم جناحَ الرحمة ويعادي الآخرين؟ نوابٌ ليس من مهمات (مجلسهم) أن يعطي شعباً برمته درساً في الأخلاق، ولا لأحدٍ منهم أن يعلمنا الوطنية. ما يحدث هنا، حدث ويحدث في أراض عربية متفرقة.. بشكل أو بآخر. المثقف العربي متهم دوماً، أو عرضة للاتهام في أي وقت، ما دام يبدع. لذا فهو ليس مطالباً بأن يبدع فحسب، لكن أن يدافع أيضاً عن إبداعه ضد قوى القمع المتربصة به عند كل منعطف. يحق لنا هنا أن نحيي ونعانق جميع القلوب العاشقة والعقول الحرة، التي عبرت عن تمسكها الجميل بالحب وبالحرية، مسألتان لا يمكن التفريط فيهما كلما تعلق الأمر بالحياة والإبداع، نريد أن نقدر الموقف الحضاري الواضح والجرئ، مطمئنين بأن ثمة مستقبلاً جميلاً لا يمكن لأحدٍ منعنا من الذهاب إليه أحراراً، وبمختلف اجتهاداتنا الفكرية والفنية. نضم صوت شعرنا وموسيقانا إليكم، لنقول لهم معاً: ارفعوا أيديكم عن حناجرنا.

الحتت دي تبعنا

مواقع لطيفة

صحاب و مدونين سكر

Designed-By

Credite